Mondragon Unibertsitateak eta Jakiunde erakundeak “Teknologian eta berrikuntzan Euskal Autonomia Erkidegoaren erronkak” izeneko jardunaldian manifestu bat aurkeztu dute. MUko errektore ohi Javier Retegik irakurri du agiria.

Berrikuntza eta teknologia arloko erronkak identifikatzeko helburuarekin jardunaldia burutzen ari da gaur Donostiako Kursaal Jauregian. Bertan aztertu dira euskal gizartearen datozen urteotako erronkak zeintzuk izango diren. Era berean, Euskadik dituen indarguneak identifikatu dira Europako berrikuntza polo gisa aritzeko.

Mondragon Unibertsitateko errektore ohi eta Eusko Jaurlaritzako Industria sailburu ohi Javier Retegik irakurri du manifestua. Ekitaldian, besteak beste, Euskadiko Lehendakari Iñigo Urkulluk eta Mondragon Unibertsitateko errektore Vicente Atxak parte hartu dute.

Manifiesto MU - Jakiune

Manifestua

Euskadi herrialde txikia da eta baliabide mugatuak ditu, baina aspalditik asmatu izan du Zientzia- eta Teknologia-gaiak euskal enpresa-sistemaren beharren arabera lehenesten eta horiekin bat egiten. Egia da Europako eskualde gehienekin alderatuta Euskadik posizionamendu nabarmena duela enpresen arloan eta zientzia eta teknologian, baina liderren trena galtzeko arriskua dago. Euskadik epe luzerako estrategia landu behar du, alderdi sendoak eta itzulkin ekonomiko eta sozialik handiena ahalbidetu dezaketen teknologiak ardatz hartuta. ‘Espezializazio Adimendunaren Estrategia’ edo ‘Research and Innovation Smart Specialisation Strategy (RIS3)’ esaten zaiona, alegia. Euskadiren kasuan, hiru lehentasun estrategiko zehaztu dira: Fabrikazio aurreratua, Energia eta Biozeintziak/Osasuna. Gaur egun, hain zuzen, oinarrizko teknologia batzuk RIS3 estrategiaren hiru lehentasunen garapen-eragile dira: Digitalizazioa, Robotika, Adimen artifiziala, Datuen analisia, Zibersegurtasuna, Gauzen Interneta edota Pertsonen eta makinen arteko elkarreragina. Baina badira beste teknologia batzuk Erronka bakoitzari berariaz dagozkionak, adibidez, potentzia-elektronika eta energia baterietan biltegiratzea –energiaren eta garraioaren sektoreen kasuan–, gehitze-fabrikazioa produkzio-sistema banatuan edo medikuntza prediktiboaren sustatzaile den genomika. Irakur gehiago